L-għanijiet ta’ dan l-Abbozz ta’ Liġi huma biex jiġi promulgat Att biex jemenda diversi liġijiet li għandhom x’jaqsmu ma’ materji dwar id-Diżabilità. Dan sabiex ikun possibbli għal Malta li tirratifika l-Konvenzjoni tal-Ġnus Magħquda dwar id-Drittijiet ta’ Persuni b’Diżabilità. Dan l-abbozz għandu wkoll l-għan aktar wiesgħa li jkompli jissaħħaħ il-qafas leġislattiv sod li japplika għal persuni b’diżabilità sabiex dan isir aktar relevanti għas-sitwazzjoni li jinsabu fiha llum il-persuni b’diżabilità.