L-għanijiet prinċipali ta’ dan l-Abbozz ta’ Liġi huma biex tiġi inkluża, fi ħdan l-Att dwar Lotteriji u Logħob Ieħor, il-projbizzjoni ta’ makni għal-logħob tad-divertiment kif ukoll makni għal-logħob tad-divertiment bi premju sakemm dawn il-makni ma jkunux liċenzjati mill-Awtorità dwar il-Lotteriji u l-Logħob. Barra minn dan, l-Abbozz ta’ Liġi qed jipproponi emendi għall-Att dwar il-Logħob, li permezz tagħhom l-Awtorità dwar il-Lotteriji u l-Logħob ikollha l-possibbiltà li toħroġ liċenzi għal każinò għal anqas minn għaxar snin kif ukoll timponi pieni amministrattivi fuq detenturi ta’ liċenzi għal xi ksur tad-disposizzjonijiet tal-Att jew ta’ regolamenti magħmulin taħtu.