L-għan ta’ dan l-Abbozz ta’ Liġi hu li jipprovdi għat-twaqqif tal-Awtorità dwar l-Għażla għas-Servizzi Ġudizzjarji li tkun responsabbli għar-rakkomondazzjoni u għażla ta’ dawk maħtura biex jaqdu d-doveri ta’ Ġudikaturi fil-Qrati liema għazla tkun trasparenti u lil hinn minn kull involviment tal-Eżekuttiv, biex tali Awtorità tkun radikata fil-Kostituzzjoni ta’ Malta, biex jiżdied il-perjodu minimu ta’ snin ta’ esperjenza għall-eliġibilità għal kariga ta’ Imħallef u Maġistrat minn 12-il sena u 7 snin rispettivament għal 15-il sena fiż-żewġ każi li minnhom 10 snin ikunu eżerċizzju regolari tal-professjoni ta’ avukat fil-Qrati u Tribunali ta’ Malta, u biex jipprovdi sabiex l-età ta’ irtirar tal-Maġistrati u Imħallfin tiżdied minn 65 sena għal 68 sena.