L-għanijiet u r-raġunijiet ta’ dan l-Abbozz ta’ Liġi huma sabiex jemenda l-proviżjonijiet tal-Kostituzzjoni ta’ Malta billi jintroduċi u jirrikonoxxi d-dritt li tgħix f’ambjent nadif, san u sostenibbli bħala dritt fundamentali tal-bniedem, u dana bħala turija ċara u inekwivoka tal-impenn ta’ Malta sabiex tipproteġi l-ambjent Malti u l-kwalità tal-ħajja għall-popolazzjoni preżenti tagħha u l-ġenerazzjonijiet li ġejjin; billi toffri protezzjoni u tikkonserva l-arja, l-art u l-baħar, billi tagħti protezzjoni lill-bijodiversità u lill-ekosistemi, billi tintroduċi kontabbiltà u responsabbiltà da parti tal-Gvern fi kwistjonijiet ambjentali, billi tappoġġja l-implimentazzjoni u l-infurzar ta’ liġijiet u regolamenti ambjentali aktar rigorużi, billi tappoġġja żieda fl-involviment pubbliku fil-governanza ambjentali, billi tippromwovi edukazzjoni fir-rigward tal-ambjent, billi tappoġġja prattika tajba biex ikollna ambjent li kapaċi jsostni s-soċjetà umana u t-tgawdija sħiħa tad-drittijiet fundamentali tal-bniedem, u billi ttejjeb il-kooperazzjoni ma’ Stati oħra għall-isforz globali favur il-protezzjoni tal-ambjent.