Il-Għan ta' dan l-Abbozz huwa li jagħmel liġi ġodda, miktuba fuq il-ħtiġiet moderni, dwar il-produzzjoni, l-importazzjoni u l-bejgħ ta' ħwejjeġ tal-ikel u mediċinali.

Skont id-dispożizzjonijiet ta' dan l-Abbozz, il-Ministru għandu s-setgħa li jagħmel leġislazzjoni sussidjarja bil-parir jew tal-Kunsill tas-Saħħa jew tal-Bord dwar Standards ta' Ħwejjeġ tal-Ikel.

Il-Bord dwar Standards ta' Ħwejjeġ tal-Ikel, li jitwaqqaf meta l-Abbozz ġdid isir liġi, ikun magħmul minn rappreżentanti tad-Dipartiment tas-Saħħa u rappreżentanti tad-Dipartiment tal-Industrija, bis-Supretendent tas-Saħħa Pubblika bħala president. Ix-xogħol ta' dan il-Bord ikun li jagħti parir lill-Ministru tas-Saħħa dwar ħwejjeġ li għandhom x'jaqsmu ma' standards minimi ta' ħwejjeġ tal-ikel.