Espressjoni ta' Interess għall-Provvista ta' Servizzi ta' Catering fil-Parlament ta' Malta
It-Tlieta, 10 Novembru 2026
Il-Parlament ta’ Malta jistieden lil operaturi ekonomiċi kkwalifikati biex jissottomettu Espressjoni ta’ Interess (EI) għall-provvista u t-tħaddim ta’ servizz ta’ catering (kafetterija) fil-bini tal-Kamra tad-Deputati, il-Parlament ta’ Malta (minn hawn ’il quddiem imsejjaħ “il-bini tal-Parlament”).
L-għan ta’ din l-EI huwa li jiġu identifikati operaturi xierqa li jkunu kapaċi jipprovdu servizzi ta’ ikel u xorb ta’ kwalità għolja lill-Membri Parlamentari, lill-persunal tal-Parlament u lil persuni oħra awtorizzati li jkollhom aċċess għall-bini tal-Parlament.
L-operatur magħżul ikun responsabbli mit-tħaddim ta’ kuljum, mill-ġestjoni u mill-manutenzjoni tal-faċilitajiet tal-kafetterija, skont il-kundizzjonijiet stipulati f’dan id-dokument.
Is-servizz qed jintalab għal perjodu inizjali ta’ sena (1) mid-data tal-iffirmar tal-kuntratt, li jista’ jiġi mġedded għal perjodi ulterjuri ta’ sena (1) kull wieħed.
2. LINJI GWIDA
2.1 Istruzzjonijiet għall-Applikanti Prospettivi
L-applikanti għandhom jippreżentaw il-Formola tal-Applikazzjoni mimlija kif suppost, flimkien mad-dokumentazzjoni ta’ sostenn kollha mitluba f’din l-EI.
L-applikanti għandhom jinnominaw rappreżentant awtorizzat, li għandu jaġixxi bħala l-persuna ta’ kuntatt prinċipali u li, f’każ li l-applikazzjoni tiġi milqugħa, jidħol f’kuntratt mas-Servizz Parlamentari.
Is-sottomissjoni ta’ applikazzjoni tikkostitwixxi aċċettazzjoni tat-termini u l-kundizzjonijiet kollha li jinsabu f’din l-EI.
L-applikanti għandu jkollhom reġistrazzjoni valida għall-finijiet tal-VAT u l-liċenzji kollha meħtieġa biex joperaw stabbilimenti ta’ catering u ta’ servizzi tal-ikel f’Malta.
L-applikazzjonijiet għandhom jibqgħu validi għal perjodu ta’ disgħin (90) jum wara l-iskadenza għas-sottomissjoni.
Is-Servizz Parlamentari jirriżerva d-dritt li jirrifjuta kwalunkwe sottomissjoni jew is-sottomissjonijiet kollha mingħajr ma jipprovdi ġustifikazzjoni.
2.2 Skeda taż-Żmien tal-Applikazzjoni
| Attività | Data |
| Pubblikazzjoni tal-EI | 10 ta' Novembru 2026 |
| Skadenza għat-talbiet għal kjarifika | 16 ta' Novembru 2026 |
| Żjara fuq il-Post |
23 ta' Novembru 2026 |
| Ħruġ tat-tweġibiet għal kjarifiki | 27 ta' Novembru 2026 |
| Skadenza għas-sottomissjoni | 7 ta' Diċembru 2026 |
L-applikazzjonijiet għandhom ikunu indirizzati lil:
L-Iskrivan tal-Kamra
Il-Parlament ta’ Malta
Misraħ il-Ħelsien
Il-Belt Valletta VLT 1010
u għandhom jintbagħtu elettronikament fuq [email protected]
Sottomissjonijiet li jaslu tard jew li ma jkunux kompluti ma jiġux ikkunsidrati. Madankollu, is-Servizz Parlamentari jirriżerva d-dritt li, fid-diskrezzjoni tiegħu, jestendi l-iskadenza għas-sottomissjoni tal-applikazzjonijiet.
L-applikazzjonijiet jinfetħu fil-11 ta’ Diċembru 2026. Skeda tal-ftuħ tal-offerti għandha titwaħħal fuq in-notice board tas-Servizz Parlamentari skont l-ordni li fiha jaslu l-applikazzjonijiet, abbażi tal-ħin irreġistrat fuq l-email li tkun waslet għand l-Iskrivan tal-Kamra. Fuq il-lista jintwerew biss l-isem jew l-ismijiet tal-applikant jew tal-applikanti li jkunu ppreżentaw applikazzjoni b’rabta ma’ din l-EI.
2.3 Rekwiżiti għas-Sottomissjoni
L-applikanti għandhom jipprovdu:
Taqsima A: Dettalji tal-Applikant
L-applikazzjoni għandha tinkludi l-informazzjoni li ġejja:
- Isem tal-Kumpanija
- Numru tar-Reġistrazzjoni tal-Kumpanija
- Numru tal-VAT
- Indirizz Reġistrat
- Persuna ta’ Kuntatt
- Numru tat-Telefon
- Indirizz tal-Email
Taqsima B: Proposta Teknika
Il-proposta għandha tinkludi:
- Deskrizzjoni tat-tħaddim tal-kafetterija
- Il-menu propost
- Lista tal-prezzijiet
- Pjan tal-persunal
- Esperjenza rilevanti
- Proċeduri tas-saħħa u s-sigurtà
- Inizjattivi favur is-sostenibbiltà
Taqsima Ċ: Dikjarazzjoni
Bis-sottomissjoni ta’ applikazzjoni, l-applikant qiegħed jikkonferma li jikkonforma mar-rekwiżiti kollha ta’ din l-EI.
Taqsima D: Dokumentazzjoni ta’ Sostenn
Flimkien mal-applikazzjoni, l-applikanti għandhom jippreżentaw ukoll:
- Ċertifikat tal-VAT
- Ċertifikat tar-Reġistrazzjoni tal-Kumpanija
- Reġistrazzjoni ta’ Negozju tal-Ikel, inklużi l-liċenzji u l-permessi
- Ċertifikat tal-Assigurazzjoni għar-Responsabbiltà Ċivili
- Ċertifikati ta’ taħriġ fl-immaniġġjar tal-ikel għall-persunal li jkun se jiġi assenjat biex jaħdem fil-bini tal-Parlament
Applikazzjonijiet li jkollhom informazzjoni obbligatorja nieqsa jistgħu jiġu skwalifikati jekk l-informazzjoni nieqsa ma tiġix ippreżentata sal-iskadenza indikata.
L-applikanti għandhom jippreżentaw id-dokumenti rilevanti f’format PDF permezz ta’ email jew ta’ links għat-trasferiment ta’ fajls (eż. wetransfer.com). Links għal sistemi ta’ cloud storage, bħal Google Drive jew OneDrive, ma jiġux ikkunsidrati.
3. TERMINI U KUNDIZZJONIJIET
3.1 Ambitu tas-Servizzi
L-operatur magħżul għandu:
1. Iħaddem il-kafetterija tal-Parlament matul il-ħinijiet tal-ftuħ miftiehma. Il-ħinijiet minimi tas-servizz matul il-ġimgħat li fihom tiltaqa’ l-Kamra mistennija jkunu kif ġej:
It-Tnejn, it-Tlieta u l-Erbgħa 3.00 – 7.00 p.m.
Il-Kamra ġeneralment tiltaqa’ minn Ottubru sa Lulju, b’waqfa ta’ madwar ġimagħtejn fil-Milied u fl-Għid.
Se jkun qed isir kull sforz biex kwalunkwe bidla fl-iskeda parlamentari tiġi kkomunikata minn qabel fi żmien suffiċjenti.
2. Jipprovdi varjetà ta’ ikel ippreparat frisk, li jista’ jinkludi:
- Sandwiches u wraps
- Insalati
- Pasti u deżerti
- Snacks ippakkjati
3. Jipprovdi varjetà ta’ xorb, inklużi:
- Te u kafè
- Ilma mingħajr gass u ilma bil-gass
- Xorb mhux alkoħoliku
- Juices
- Birra
4. Iżomm lista tal-prezzijiet aġġornata f’post li jidher.
5. Jiżgura li l-prodotti fil-menu jkunu disponibbli b’mod konsistenti matul il-ħinijiet kollha tal-ftuħ.
6. Iżomm standards professjonali xierqa fis-servizz mogħti lill-klijenti.
3.2 Il-Post u t-Tagħmir
- Is-Servizz Parlamentari jqiegħed għad-dispożizzjoni tal-operatur magħżul iż-żona indikata għall-użu tiegħu, li tinkludi faċilitajiet bażiċi ta’ catering.
- L-operatur magħżul mitlub jipprovdi kwalunkwe tagħmir addizzjonali, platti, kikkri, tazzi eċċ u oġġetti oħra meħtieġa għat-tħaddim tas-servizz li ma jkunux diġà disponibbli. Kwalunkwe tagħmir elettriku għandu jiġi approvat mis-Servizz Parlamentari qabel ma jintuża.
- L-operatur magħżul ikun responsabbli għall-użu xieraq tat-tagħmir kollu użat fl-għoti tas-servizz.
- L-operatur għandu jżomm il-post nadif, iġjeniku u f’kundizzjoni tajba f’kull ħin.
3.3 Rekwiżiti tal-Persunal
Huwa d-dmir tal-operatur magħżul li:
- Jassenja kemm meħtieġ persunal li jkun ikkwalifikat kif xieraq.
- Jiżgura li l-persunal assenjat ikun kapaċi jikkomunika kemm bil-Malti kif ukoll bl-Ingliż.
- Jiżgura li l-persunal ikun liebes uniformi xierqa.
- Jiżgura li l-persunal kollu assenjat ikollu ċertifikati validi fl-immaniġġjar tal-ikel.
- Jikkonforma mar-regolamenti kollha dwar l-impjieg u x-xogħol.
3.4 Konformità mar-Rekwiżiti tas-Saħħa, is-Sigurtà u mar-Regolamenti
Għandu jkun id-dmir tal-operatur magħżul li:
- Iħaddem proċeduri xierqa tal-HACCP u jiżgura konformità mar-regolamenti lokali kollha applikabbli dwar is-sikurezza tal-ikel, is-saħħa u l-iġjene.
- Jakkwista u jżomm il-liċenzji u l-permessi kollha meħtieġa mil-liġi.
- Jimplimenta proċeduri xierqa dwar is-saħħa u s-sigurtà.
- Ikollu assigurazzjoni valida għar-responsabbiltà ċivili matul il-perjodu kollu tal-kuntratt.
- Jikkoopera mal-awtoritajiet kompetenti fi kwalunkwe spezzjoni li jwettqu.
3.5 Sostenibbiltà
Is-Servizz Parlamentari jinkoraġġixxi prattiki sostenibbli, inklużi:
- It-tnaqqis tal-użu ta’ plastik li jintuża darba biss
- Is-separazzjoni u r-riċiklaġġ tal-iskart
- L-akkwist ta’ prodotti minn sorsi sostenibbli
- Użu effiċjenti tal-enerġija
- Ippakkjar li jirrispetta l-ambjent
L-applikanti għandhom jiddeskrivu l-miżuri li se jieħdu favur is-sostenibbiltà fil-proposta tagħhom.
3.6 Għażla u Evalwazzjoni
Kull applikazzjoni tiġi ttrattata b’kunfidenzjalità stretta mill-kumitat ta’ evalwazzjoni. Is-Servizz Parlamentari jirriżerva d-dritt li, fid-diskrezzjoni tiegħu, jagħżel u/jew jirrifjuta kwalunkwe waħda mill-applikazzjonijiet sottomessi jew l-applikazzjonijiet kollha. Jekk ebda wieħed mill-applikanti ma jitqies sodisfaċenti, is-Servizz Parlamentari jirriżerva d-dritt li jafda s-servizz indikat lil operaturi ekonomiċi oħra (li mhux bilfors ikunu pparteċipaw f’din l-EI).
Il-kuntratt jingħata lill-applikant li jissottometti l-offert li tikseb l-ogħla punteġġ skont it-Tabella ta’ Evalwazzjoni u li jinkludu r-rekwiżiti kollha ta’ dan id-dokument tal-EI. Jekk aktar minn applikant wieħed jikseb l-istess punteġġ, il-kuntratt jingħata mis-Servizz Parlamentari fuq bażi ta’ liema offerta tkun waslet l-ewwel, skont il-ħin irreġistrat fuq l-email li jkun fiha l-formola tal-applikazzjoni u d-dokumenti relatati.
L-applikazzjonijiet jiġu evalwati skont il-kriterji li ġejjin:
| Kriterji | Punti | |||
| Minimu | Massimu | |||
| 1 | Prodotti tal-Ikel* | |||
| Sandwiches u wraps | Minimu ta' 2 tipi | 5 | 10 | |
| Insalati | Minimu ta' tip wieħed | 5 | 10 | |
| Pasti u Deżerti | Minimu ta' 2 tipi | 5 | 10 | |
| Snacks Ippakkjati | Minimu ta' 2 tipi | 5 | 10 | |
| 2 | Xorb | |||
| Te u Kafè | 5 | 5 | ||
| Ilma mingħajr gass u ilma bil-gass (Bottijiet/Fliexken żgħar) | 5 | |||
| Xorb mhux alkoħoliku u juices (bottijiet/fliexken żgħar) | Minimu ta' tip wieħed/Massimu ta' 3 tipi | 5 | ||
| Birra (bottijiet/fliexken żgħar) | Minimu ta' tip wieħed | 5 | ||
| 3 | Price List | |||
| Prezz meta mqabbel mal-kwalità | 10 | |||
| 4 | Persunal | |||
| Persunal assenjat għas-servizz | Minimu ta' persuna waħda/Massimu ta' 2 persuni | 5 | ||
| 5 | Kunsiderazzjoni ta' Prattika Sostenibbli | Abbażi tal-miżuri ddikjarati | 5 | |
| Total | 60 |
* Għandhom jiġu indikati l-allerġeni fil-prodotti tal-ikel. Għandha tiġi inkluża tal-inqas għażla waħda gluten free u għażla waħda vegana. Jingħata punt addizzjonali għal kull prodott ieħor addizzjonali.
Punteġġ minimu meħtieġ: 60 punt
L-applikanti li ma jiksbux il-punteġġ minimu meħtieġ jiġu skwalifikati minn din l-EI.
3.7 Arranġamenti Finanzjarji
L-operatur magħżul ikun responsabbli, bi spejjeż u riskju tiegħu stess, għall-akkwist, il-preparazzjoni, il-provvista u s-servizz tal-ikel u x-xorb kollu li għandu jkun disponibbli skont il-kuntratt, inklużi l-ispejjeż kollha relatati mal-persunal, l-ingredjenti, il-provvisti, it-tagħmir, it-trasport, il-ħażna u spejjeż operattivi oħra.
L-operatur magħżul iżomm id-dħul kollu ġġenerat mill-bejgħ tal-ikel u x-xorb u jkun unikament responsabbli għall-ispejjeż u n-nefqa kollha li jsiru għall-provvista tas-servizz. Għaldaqstant, kwalunkwe profitt li jirriżulta mit-tħaddim tas-servizz jakkumula kollu kemm hu favur l-operatur magħżul, filwaqt li kwalunkwe telf jiġi sostnut kollu kemm hu minnu.
Ma għandu jitħallas ebda korrispettiv finanzjarju mill-operatur magħżul lis-Servizz Parlamentari, jew viċi versa, fir-rigward tat-tħaddim tas-servizz.
3.8 Indennizz
L-operatur magħżul għandu jindennizza u jżomm indemni lill-Parlament ta’ Malta, lill-membri tiegħu u lill-impjegati tiegħu minn kwalunkwe pretensjoni, responsabbiltà, telf, dannu u spiża li jirriżultaw mit-tħaddim tas-servizz ta’ catering.
ANNESS 1
FORMOLA TAL-APPLIKAZZJONI
TAQSIMA A – DETTALJI TAL-APPLIKANT
Isem tal-Kumpanija:
Numru tar-Reġistrazzjoni tal-Kumpanija:
Numru tal-VAT:
Indirizz:
Persuna ta’ Kuntatt:
Numru tal-Mobile:
Indirizz tal-Email:
TAQSIMA B – PROPOSTA
1. Kunċett tas-Servizz ta’ Catering
Deskrizzjoni tas-servizzi li għandhom jiġu pprovduti.
2. Menu Propost
Ehmeż il-menu propost u l-lista tal-prezzijiet.
3. Ħinijiet tat-Tħaddim
Il-ħinijiet tat-tħaddim proposti, li għandhom ikunu tal-inqas dawk indikati fit-Taqsima 3.1(1) ta’ din l-EI.
4. Pjan tal-Persunal
In-numru ta’ impjegati u r-rwoli tagħhom.
5. Esperjenza Rilevanti
Kuntratti preċedenti relatati ma’ kafetteriji jew servizzi ta’ catering.
TAQSIMA Ċ – DIKJARAZZJONI
Jiena/Aħna niddikjara/w li l-informazzjoni kollha ppreżentata hija korretta u li naċċetta/w il-kundizzjonijiet li jinsabu f’din l-Espressjoni ta’ Interess.
Isem:
Firma:
Data:
TAQSIMA D – DOKUMENTAZZJONI RIKJESTA
☐ Formola tal-Applikazzjoni mimlija
☐ Ċertifikat tar-Reġistrazzjoni tal-Kumpanija
☐ Ċertifikat tal-VAT
☐ Ċertifikat tal-Assigurazzjoni għar-Responsabbiltà lejn Tterzi Persuni
☐ Reġistrazzjoni ta’ Negozju tal-Ikel
☐ Ċertifikati fil-Food Handling
☐ Menu propost bil-lista tal-prezzijiet
☐ Profil tal-Kumpanija
☐ Kwalunkwe dokumentazzjoni oħra relatata
DIKJARAZZJONI TA’ ĊAĦDA TA’ RESPONSABBILTÀ
Bis-sottomissjoni ta’ applikazzjoni, l-applikanti jikkonfermaw li qraw, fehmu u aċċettaw it-termini u l-kundizzjonijiet kollha li jinsabu f’din l-Espressjoni ta’ Interess, u li l-informazzjoni kollha ppreżentata hija korretta u kompluta.